[BLH]

გადახდის წყაროსთან გადასახადის დაკავების წესი

 

როგორც უკვე ავღნიშნეთ, გადახდის წყაროსთან გადასახადის დაკავება ევალება საგადასახადო აგენტს. საგადასხადო აგენტი შეიძლება იყოს საწარმო/ორგანიზაცია ან მეწარმე ფიზიკური პირი, ხოლო არამეწარმე ფიზიკურ პირს არ გააჩნია საგადასახდო აგენტის ფუნქციები.

 

მაგ: წარმოვიდგინოთ ორი შემთხვევა, შპს-მ ისესხა 10.000 ლარი ნიკასგან და ფიზიკურმა პირმა მარიამა (რომელიც არ ეწევა სამეწარმეო საქმიანობას) ისესხა 10.000 ლარი ნიკასგან.

 

პირველ შემთხვევაში სესხის პროცენტების საშემოსავლო გადასხადის (5%) წყაროსთან დაკავების ვალდებულება გააჩნია შპს-ს, ხოლო მეორე შემთხვევაში ფიზიკურ პირ მარიამს არ ევალება ასეთი ვალდებულება.

 

აღნიშნულის გათვალისწინებით, სსკ-ის 154-ე მუხლში ჩამოთვლილია კონკრეტულად თუ ვინ შეიძლება იყოს საგადასხადო აგენტი. მათგან გამოვყოთ ძირითადი:

 

1. პირი, რომელიც დაქირავებულს უხდის ხელფასს;

 

2. პირი, რომელიც პირს უხდის პენსიას, გარდა იმ პენსიისა, რომელიც გაიცემა სახელმწიფო სოციალური უზრუნველყოფის სისტემაში;

 

3. პირი, რომელიც არარეზიდენტს გადასხადებს აკავებს წყაროსთან. (საგადასხადო კოდექსის 134-ე მუხლის პირველი ნაწილით გათვალისწინებულ გადასახადებს);

 

4. საწარმო/ორგანიზაცია ან მეწარმე ფიზიკური პირი, რომელიც გაწეული მომსახურების ღირებულებას უნაზღაურებს ფიზიკურ პირს, რომელსაც არ აქვს გადასახადის გადამხდელის მოწმობა;

 

5. წამახალისებელი გათამაშების, სამორინეს, აზარტული თამაშების, ლოტოს, ბინგოსა და ლატარიის მომწყობი პირი, რომელიც ფიზიკურ პირს უხდის მოგებას.

 

6. რეზიდენტი საწარმო, რომელიც პირს უხდის დივიდენდს; პირი, რომელიც პირს უხდის პროცენტს და პირი, რომელიც ფიზიკურ პირს უხდის როიალტს;

 

7. პირი, რომელიც უსასყიდლოდ გადასცემს ქონებას ფიზიკურ პირს, რომელსაც არ აქვს გადასახადის გადამხდელის მოწმობა, გარდა ამ პირის მიერ ამავე ფიზიკური პირისათვის საგადასახადო წლის განმავლობაში 1000 ლარამდე ღირებულების ქონების უსასყიდლოდ გადაცემისა;

 

როგორც ზემოთ უკვე განვიხილეთ, გადახდის წყაროსთან გადასახადის დაკავებისას გადასახადის დაკავებისა და ბიუჯეტში მისი გადარიცხვისათვის პასუხისმგებლობა ეკისრება შემოსავლის გადამხდელს (საგადახადო აგენტს).

 

გადასახადის თანხის დაუკავებლობის შემთხვევაში შემოსავლის გადამხდელი ვალდებულია ბიუჯეტში შეიტანოს დაუკავებელი გადასახადის თანხა ფაქტობრივად გადახდილი ანაზღაურების შესაბამისად და მასთან დაკავშირებული სანქციები;

 

საგადასხადო აგენტი, რომელიც გადახდის წყაროსთან აკავებს გადასხადს, ვალდებულია ბიუჯეტში გადარიცხოს გადასახადი პირისათვის თანხის გადახდისთანავე, ხოლო განაცემის არაფულადი ფორმით განხორციელების შემთხვევაში – შესაბამისი თვის ბოლო რიცხვში.

 

მაგ: შპს „ა“-ში არის დასაქმებული „ბ“, რომლის ყოველთვიური ხელფასი შეადგენს 500 ლარს. ხელფასის გადახდისას „ბ“-ს ხელზე ასაღები ხელფასის თანხაა 400 ლარი, ხოლო 100 ლარი შპს-მ უნდა გადარიცხოს ბიუჯეტში იმავე დღეს, როცა მოხდება ხელფასის „ბ“-სთვის ჩარიცხვა.

 

საგადასხადო აგენტი ასევე ვალდებულია წარუდგნინოს საგადასხადო ორგანოს ცნობა შემოსავლის მიმღები პირის სარეგისტრაციო ნომრის, გვარისა და სახელის, საცხოვრებელი ადგილის მისამართის, საანგარიშო პერიოდისათვის შემოსავლის საერთო თანხისა და დაკავებული გადასახადის საერთო თანხის მითითებით, არა უგვიანეს გადასახადის დაკავების თვის მომდევნო თვის 15 რიცხვისა.

 

საგადასხადო აგენტი ვალდებულია წყაროსთან გადასხადის დაბეგვრის შემდგომი თვის არაუგვიანეს 15 რიცხვისა წარადგინოს ფინანსთა მინისტრის N-999 ბრძანებით გათვალისწინებული ფორმით დეკლარაცია, განხორციელებული განაცემების დაბეგვრასთან დაკავშირებით.

 

მაგ: თუ მარტში მოხდა წყაროსთან გადასხადის დაბეგვრა, აპრილის 15 რიცხვამდე უნდა მოხდეს, როგორც დეკლარაციის, ისე ცნობის წარდგენა.

[BLH]

ზარალის გადატანა

 

მეწარმე ფიზიკური პირის მიერ აქტივის (გარდა ეკონომიკურ საქმიანობაში გამოყენებული აქტივისა) რეალიზაციით მიღებული ზარალის კომპენსაცია ხდება იმავე სახის აქტივის რეალიზაციით მიღებული ღირებულების ნამეტით. თუ ზარალის კომპენსაცია იმავე წელს შეუძლებელია, ზარალი მომდევნო წელს არ გადაიტანება.

 

მაგ: 2015 წლის მარტში მეწარმე ფიზიკურმა პირმა იყიდა ორი ბინა საცხოვრებლად, თითოეულის ღირებულება იყო 140.000 ლარი.  2016 წლის იანვარში მან ერთ-ერთი  ბინა გაყიდა 120.000 ლარად, შესაბამისად მისმა ზარალმა შეადგინა 20.000 ლარი. 2016 წლის დეკემბერში მეორე ბინაც გაყიდა 160.000 ლარად, შესაბამისად მოცემულ შემთხვევაში მან მიიღო ნამეტი – 20.000 ლარი, რომლითაც კომპენსირდება პირველი ბინის გაყიდვიდან მიღებული ზარალი.

 

იმ შემთხვევაში თუ მეორე ბინას გაყიდიდა 2017 წელს, ზარალის გადატანა არ მოხდებოდა და შესაბამისად 20.000 ლარი დაიბეგრებოდა, როგორც ნამეტი შემოსავალი.

 

საგადასახადო წლის განმავლობაში ფიზიკური პირის (გარდა მეწარმე ფიზიკური პირისა) მიერ აქტივის რეალიზაციით მიღებული ზარალის კომპენსაცია ხდება იმავე სახის აქტივის რეალიზაციით მიღებული ნამეტით. ამასთანავე, თუ ზარალის კომპენსაცია იმავე წელს შეუძლებელია, ზარალი მომდევნო წელს არ გადაიტანება.

 

მეწარმე ფიზიკური პირის მიმართ გამოქვითვების გადამეტება ეკონომიკური საქმიანობით მიღებულ ერთობლივ შემოსავალზე, რომელიც დაკავშირებული არ არის დაქირავებით მუშაობასთან, არ გამოიქვითება ამ პირის მიერ მიღებული ხელფასის ხარჯზე. იგი გადაიტანება 5 წლამდე ვადით და დაიფარება მომავალი პერიოდების ერთობლივი შემოსავლის გამოქვითვებზე გადამეტების ხარჯზე, რომელიც დაკავშირებული არ არის დაქირავებით მუშაობასთან.

 

მაგ: ინდ. მეწარმე ნინო ხვედელიანმა 2013 საგადასხადო წელს, მიიღო 50.000 შემოსავალი ეკონომიკური საქმიანობიდან და 20.000 ლარი ხელფასის სახით. ამავდროულად მისმა ხარჯებმა, რომლებიც დაკავშირებული იყო ეკონომიკურ საქმიანობასთან შეადგინა 60.000 ლარი.

 

მოცემულ შემთხვევაში მისი ზარალი იქნება 50.000-60.000= 10.000 ლარი, რომელიც არ გამოაკლდება ხელფასის სახით მიღებულ 20.000 ლარს და მოხდება მისი გამოქვითვა მომდევნო 5 წლის მანძილზე მიღებული ერთობლივი შემოსავლიდან.

 

იურიდიული პირის მიმართ გამოქვითვების გადამეტება ერთობლივ შემოსავალზე გადაიტანება 5 წლამდე ვადით და დაიფარება მომავალი პერიოდების ერთობლივი შემოსავლის გამოქვითვებზე გადამეტების ხარჯზე.

 

[BLH]

წარმომადგენლობითი ხარჯების გამოქვითვის შეზღუდვა

 

ეკონომიკური საქმიანობის განმახორციელებელ პირს უფლება აქვს, გამოქვითოს წარმომადგენლობითი ხარჯები არა უმეტეს საგადასახადო წლის განმავლობაში მიღებული ერთობლივი შემოსავლის 1 პროცენტის ოდენობით.

 

მაგ: ლაშა ინდ. მეწარმეა, მის მიერ ეკონომიკური საქმიანობიდან მიღებულმა ერთობლივმა შემოსავალმა 2014  საგადასახადო წელს შეადგინა 50.000 ლარი. იგი უფლებამოსილია გამოქვითოს წარმომადგენლობითი ხარჯები არაუმეტეს 500 ლარისა.

 

წარმომადგენლობითი ხარჯი წარმოადგენს პირის მიერ ეკონომიკური საქმიანობის ფარგლებში გაწეული ხარჯი, რომელიც მოიცავს:

 

ა) პირის სახელით გამართული ღონისძიებებისათვის (პრეზენტაციები, მიღებები) გათვალისწინებულ (წვენები, მინერალური წყლები, გამაგრილებელი სასმელები, ჩაი, ყავა, საუზმე, სადილი, ვახშამი, ბანკეტი) ხარჯებს;

 

ბ) საექსკურსიო და კულტურულ-სანახაობითი ღონისძიებების ხარჯებს;

 

გ) სუვენირების შეძენის ხარჯებს;

 

დ) სტუმრების მომსახურების უზრუნველყოფის ხარჯებს, მათ შორის:

 

დ.ა) საკონსულო მომსახურების (ვიზების გაფორმება, ვადის გაგრძელება) ხარჯებს;

 

დ.ბ) აეროპორტში დახვედრისა და გაცილების (VIP-დარბაზის მომსახურება) ხარჯებს;

 

დ.გ) სატრანსპორტო მომსახურების ხარჯებს;

 

დ.დ) სასტუმრო მომსახურების (ადგილების დაჯავშნა, ცხოვრების ღირებულება) ხარჯებს;

 

დ.ე) მიღებებისა და წვეულებებისათვის გათვალისწინებულ (წვენები, მინერალური წყლები, გამაგრილებელი სასმელები, ჩაი, ყავა, საუზმე, სადილი, ვახშამი, ბანკეტი) ხარჯებს.

 

 

[BLH]

აქტივების ღირებულების სრულიად გამოქვითვა

 

ძირითადი საშუალებების მიმართ, გარდა საწარმოს კაპიტალში შეტანილისა, გადასახადის გადამხდელს უფლება აქვს, სრულად გამოქვითოს ამ აქტივების ღირებულება იმ საგადასახადო წელს, როდესაც ძირითადი საშუალებები ექსპლუატაციაში შევიდა.

 

მაგ: 2014 წელს კომპანია „X”-მა შეიძინა 100.000 ლარის ღირებულების მანქანა-დანადგარები და დაიწყო მათი ექსპლოატაცია იმავე წელს. კომპანიამ გადაწყვიტა ამავე წელს სრულიად გამოექვითა აქტივების ღირებულება ერთობლივი შემოსავლებიდან. ასეთ შემთხვევაში კომპანია უფლებამოსილია 100.000 ლარი აჩვენოს ხარჯებში.

 

ძირითადი საშუალებების ღირებულების სრულად გამოქვითვის უფლების გამოყენების შემთხვევაში გადასახადის გადამხდელი ვალდებულია იგივე მეთოდი გამოიყენოს ყველა შემდგომი შესყიდული (წარმოებული) ძირითადი საშუალების მიმართ.

 

მაგ: წინა მაგალითის გათვალისწინებით, 2015 წელს კომპანია „X”-მა შეიძინა 50.000 ლარის ღირებულების საოფისე დანადგარები და დაიწყო მათი ექსპლოატაცია იმავე წელს. მათი ღირებულების გამოქვითვა უნდა მოხდეს, იმავე მეთოდით, რაც იქნა გამოყენებული 2014 წელს მანქანა-დანადგარების მიმართ, ანუ მთლიანად უნდა მოხდეს მათი გამოქვითვა 2015 წლის ერთობლივი შემოსავლებიდან.

 

ძირითადი საშუალებების ღირებულების სრულად გამოქვითვის შემთხვევაში:

 

ა) აღნიშნული ძირითადი საშუალებები არ შეიტანება საგადასახადო კოდექსის 111-ე მუხლით გათვალისწინებული ჯგუფის ღირებულებით ბალანსში;

 

ბ) შემდგომში ასეთი აქტივების მიწოდებისას მიღებული ან/და მისაღები თანხები, ხოლო ასეთის არარსებობისას – საბაზრო ღირებულება დამატებული ღირებულების გადასახადის გარეშე ექვემდებარება ერთობლივ შემოსავალში ჩართვას.

 

მაგ: კომპანიამ 2015 წელს სრულიად გამოქვითა შეძენილი ავტომობილის ღირებულება, თუმცა 2016 წელს აღნიშნული ავტომობილი გაყიდა 10.000 ლარად. ასეთ შემთხვევაში, ეს თანხა შეიტანება ერთობლივ შემოსავლებში.

 

ძირითადი საშუალებების ღირებულების სრულად გამოქვითვის შემთხვევაში გადასახადის გადამხდელს უფლება არ აქვს, არჩეული გამოქვითვის ნორმა შეცვალოს 5 წლის განმავლობაში. ამასთანავე, გამოქვითვის ასეთი ნორმის არჩევა უნდა მოხდეს იმ საგადასახადო წელს, როდესაც ძირითადი საშუალებები ექსპლუატაციაში შევიდა.

 

ძირითადი საშუალებების ღირებულების სრულად გამოქვითვის უფლება არ ვრცელდება ისეთ ძირითად საშუალებებზე, რომლებიც არ ექვემდებარება ამორტიზაციას.  მაგ: მიწაზე.

 

[BLH]

დაჩქარებული ამორტიზაცია

 

გადასახადის გადამხდელს უფლება აქვს,  მე-2 და მე-3 ჯგუფებზე გამოიყენოს დაჩქარებული ამორტიზაციის ნორმა, მაგრამ არა უმეტეს ცხრილში გათვალისწინებული შესაბამისი ნორმის ორმაგი ოდენობისა.

 

მაგ: 2013 წელს კომპანიის ძირითადი საშუალებბეის მე-2 ჯგუფის ღირებულებითი ბალანსი შეადგენს 10.000 ლარს, ხოლო მე-3 ჯგუფისა- 20.000 ლარს.

 

მოცემულ შემთხვევაში დაჩქარებული ამორტიზაციის ნორმის გამოყენების შემთხვევაში, მე-2 ჯგუფის საამორტიზაციო დანარცხი შეადგენს 40% (4.000 ლარს), ხოლო მე-3 ჯგუფისა- 16% (3.200 ლარს).

[BLH]

უსასყიდლოდ მიღებული ძირითადი საშუალებების გავლენა ჯგუფის ღირებულებით ბალანსზე

 

მაგ: 2015 წელს კომპანიამ უსასყიდლოდ მიიღო 5 კომპიუტერი, საერთო ღირებულებით 10.000 ლარი.

 

აღნიშნული კომპიუტერების ღირებულების დამატება მოხდება ჯგუფის ღირებულებით ბალანსზე, თუმცა ამავდროულად მათი ღირებულება დაემატება 2015 წლის ერთობლივ შემოსავალს.

 

 

 

[BLH]

აქტივების გასხვისების გავლენა ჯგუფის ღირებულებით ბალანსზე

 

თუ საგადასახადო წლის განმავლობაში ჯგუფის ძირითად საშუალებათა რეალიზაციის თანხა, ხოლო ძირითად საშუალებათა უსასყიდლოდ მიწოდებისას – მათი საბაზრო ღირებულება, აღემატება ჯგუფის ღირებულებით ბალანსს წლის ბოლოსთვის, ნამეტი თანხა ჩაირთვება ერთობლივ შემოსავალში და ჯგუფის ღირებულებითი ბალანსი ნულს გაუტოლდება.

 

მაგ: 2014 წელს პირველი ჯგუფის ღირებულებითი ბალანსი შეადგენდა 100.000 ლარს. ამავე წელს იქნა გაყიდული ამავე ჯგუფში შემავალი ძირითადი საშუალებების ნახევარი, ღირებულებით – 50.000 ლარი. ასევე უსასყიდლოთ იქნა გადაცემული ძირითადი საშუალებების დარჩენილი ოდენობა, რომელთა საბაზრო ღირებულება შეადგენდა 65.000 ლარს.

 

მოცემულ სიტუაციაში ჯგუფის ღირებულებით ბალანსს გამოაკლდება, ჯგუფში შემავალი ძირითადი საშუალებების რეალიზაციის თანხა – 50.000 ლარი და უსასყიდლოდ გასხვისებული ძირითადი საშუალებების საბაზრო ღირებულება – 65.000 ლარი, ამდენად 100.000-50.000-65.000= 15.000 ლარი აისახება ერთობლივ შემოსავალში.

[BLH]

ძირითად საშუალებათა ჯგუფში არ შეიტანება და ღირებულებითი ბალანსის განსაზღვისას მხედველობაში არ მიიღება:

 

ა) არაამორტიზებადი ძირითადი საშუალებები;

 

ბ) იჯარით აღებული ძირითადი საშუალებები;

 

გ) ძირითადი საშუალებების გადაფასებით მიღებული სხვაობა (გაზრდა ან შემცირება);

 

დ) 1000 ლარამდე ღირებულების ძირითადი საშუალებები;

 

ე) ის აქტივები, რომელთა მიმართ გადასახადის გადამხდელის მიერ გამოიყენება 100 %-იანი ამორტიზაციის დარიცხვა, სკ-ის 112-ე მუხლის შესაბამისად.

 

ვ) ძირითადი საშუალებები, რომლებიც არ არის ექსპლუატაციაში გადაცემული და სხვა.

 

[BLH]

ჯგუფის ღირებულებით ბალანსის გამოთვლა

 

საგადასახადო წლის ბოლოსთვის ჯგუფის ღირებულებით ბალანსს შეადგენს შემდეგი წესით განსაზღვრული თანხა – საანგარიშოს წინა საგადასახადო წლის ბოლოსთვის ჯგუფის ღირებულებითი ბალანსი:

 

1. მცირდება:

 

ა) საანგარიშოს წინა საგადასახადო წელს დარიცხული ამორტიზაციის თანხით;

 

მაგ: ავტომობილების ჯგუფის ღირებულებითი ბალანსი 2012 წელს იყო 10.000 ლარი და მას დაერიცხა ამორტიზაცია 20%-ის ოდენობით. 2013 წელს ამავე ჯგუფის ღირებულებითი ბალანსი იქნება 8.000 ლარი. (გამოაკლდება 20 %-2.000 ლარი).

 

ბ) საგადასახადო კოდექსის 111.8 და 111.9 ნაწილების შესაბამისად წარმოებული გამოქვითვების თანხით;

 

გ) საანგარიშო საგადასახადო წლის განმავლობაში ჯგუფის ძირითად საშუალებათა რეალიზაციის თანხით, ხოლო ძირითად საშუალებათა უსასყიდლოდ მიწოდებისას – საბაზრო ღირებულებით;

 

მაგ: ავტომობილების ჯგუფის ღირებულებითი ბალანსი 2013 წელს იყო 10.000 ლარი (ორი ავტომობილის საფასური, თითოეულის 5.000 ლარი). ამავე წელს, კომპანიამ გაყიდა ერთ-ერთი ავტომობილი 7.000 ლარად. ასეთ შემთხვევაში ამ ჯგუფის ღირებულებითი ბალანსი  გახდება 10.000-7.000= 3.000 ლარი.

 

თუ კომპანია გააჩუქებს ავტომობილს, მაშინ ჯგუფის ღირებულებითი ბალანსი გახდება 10.000-5.000=5.000 ლარი.

 

2. იზრდება:

 

ა) საანგარიშო საგადასახადო წლის განმავლობაში ჯგუფისათვის დამატებული, საგადასახადო კოდექსის 148-ე მუხლის თანახმად განსაზღვრული ძირითად საშუალებათა (გარდა ძირითადი საშუალებებისა, რომლებიც ამორტიზაციას არ ექვემდებარება) ღირებულებით;

 

მაგ: 2013 წელს პირველი ჯგუფის ღირებულებითი ბალანსი იყო 15.000 ლარი. ამავე წელს კომპანიამ შეიძინა ამ ჯგუფს მიკუთვნებული ძირითადი საშუალებები, საერთო ღირებულებით- 20.000 ლარი. ამდენად წლის ბოლოსთვის ჯგუფის ღირებულებითი ბალანსი იქნება 35.000 ლარი და ამ თანხიდან მოხდება ცვეთის დარიცხვა.

 

ბ) საანგარიშო საგადასახადო წლის განმავლობაში ძირითად საშუალებებზე გაწეული რემონტის ხარჯების ზღვრული დონის ზემოთ არსებული თანხით, საგადასახადო კოდექსის 115-ე მუხლის მე-2 ნაწილის შესაბამისად.

 

[BLH]

ცვეთის დარიცხვა

 

ძირითადი საშუალებები, რომლებიც ამორტიზაციას ექვემდებარება, ჯგუფდება  ზემოთ მითითებულ ცხრილში განსაზღვრული ამორტიზაციის ნორმების მიხედვით.

 

ამდენად, ცვეთა ძირითად საშუალებას ინდივიდუალურად არ ერიცხება. ძირითადი საშუალებები ჯგუფდება და ცვეთა ერიცხება მათ ჯამურ ღირებულებას.

 

ეს ნიშნავს, რომ საგადასახადო აღრიცხვისთვის ცალკეულ ძირითად საშუალებას აღარ აქვს ინდივიდუალური ღირებულება, არამედ ჯგუფის ყველა ძირითად საშუალებას, მათი სახეობისა თუ სიძველის მიუხედავად, ერთი და იგივე საშუალო ჯგუფური ღირებულება აქვს.

 

თითოეული ჯგუფის საამორტიზაციო ანარიცხების ოდენობა გამოიანგარიშება საგადასახადო წლის ბოლოს ჯგუფის ღირებულებითი ბალანსიდან, ცხრილში ამორტიზაციის ნორმების შესაბამისად.

 

მაგ: ტრანსპორტი, სამშენებლო მოწყობილობები, ავეჯი ოფისისთვის და ა.შ. გაერთიანდებიან პირველ ჯგუფში. ცვეთა დაერიცხებათ არა ინდივიდუალურად აღნიშნული ძირითად საშუალებებს, არამედ მათი საერთო ღირებულებითი ბალანსიდან.

 

თუ კომპანია „x”-მა 2012 წელს შეიძინა ავტომობილი, ღირებულებით- 10.000 ლარი და ავეჯი ღირებულებით 6.000 ლარი. აღნიშნული აქტივები გაერთიანდება და მათ საერთო ღირებულებას 16.000 ლარიდან მოხდება 20%-ის 3.200 ლარის ხარჯებში გატარება, როგორც ცვეთისა.

 

ხოლო შემდეგ 2013 წელს, აღნიშნული ჯგუფის ღირებულებითი ბალანსი იქნება 16.000-3.200 = 12.800 ლარი  და სწორედ ამ თანხიდან მოხდება ცვეთის გამოანგარიშება.

 

ზემოთ აღნიშნული საერთო წესიდან გამონაკლისია შენობა-ნაგებობების შემთხვევაში, მათ ამორტიზაცია დაერიცხება თითოეულ ნაგებობაზე ცალ- ცალკე. შესაბამისად, თითოეული ნაგებობა ცალკე ჯგუფად განიხილება.

 

[Author]

Posts