საჯარო სამსახურში კონკურსის ჩატარება
პირი თანამდებობაზე შეიძლება დაინიშნოს მხოლოდ კონკურსის შედეგად, გარდა საჯარო სამსახურის შესახებ 30-ე მუხლით გათვალისწინებული გამონაკლისი შემთხვევებისა.
კონკურსის გამოცხადება
ვაკანტური თანამდებობის დასაკავებლად, ცხადდება საჯარო კონკურსი, საჯარო სამსახურის ბიუროს მიერ, ადმინისტრირებული ვებგვერდის მეშვეობით.
ამასთანავე, კანდიდატს განცხადების წარსადგენად ეძლევა არანაკლებ 10-დღიანი ვადა კონკურსის გამოცხადების დღიდან.
კონკურსის შესახებ შეტყობინება უნდა შეიცავდეს შემდეგ მინიმალური მონაცემებს:
ა)კონკურსის წესით დასაკავებელი თანამდებობის დასახელება;
ბ) კანდიდატის მიმართ წაყენებული მოთხოვნები;
გ) შესასრულებელი სამუშაო;
დ) თანამდებობრივი სარგოს ოდენობა;
ე) განცხადებისა და სხვა აუცილებელი დოკუმენტების წარდგენის ვადა;
ვ) შესაბამისი საკონკურსო-საატესტაციო კომისიის მისამართი.
კონკურსში მონაწილეობისათვის განცხადების წარდგენა
კონკურსში მონაწილეობისათვის განცხადების წარდგენა შეიძლება მხოლოდ ელექტრონული ფორმით, საჯარო სამსახურის ბიუროს მიერ ადმინისტრირებული ვებგვერდის მეშვეობით.
კონკურსის მონაწილის შეფასება
საკონკურსო-საატესტაციო კომისია აფასებს კანდიდატების შესაბამისობას ვაკანტური თანამდებობის დასაკავებლად დადგენილ მოთხოვნებთან, აუცილებლობის შემთხვევაში ისმენს აღნიშნულ თანამდებობაზე დანიშვნის უფლების მქონე პირების აზრს და გამოაქვს თავისი გადაწყვეტილება, ვაკანტურ თანამდებობაზე დასანიშნად ერთ_ერთი კანდიდატის წამოყენებისა ან კანდიდატების წამოყენებაზე უარის თქმის შესახებ.
საკონკურსო – საატესტაციო კომისიის თავმჯდომარე, მისი არყოფნის შემთხვევაში კი კომისიის თავმჯდომარის მოადგილე ან კომისიის სხვა უფლებამოსილი წევრი, გადაწყვეტილების გამოტანიდან არა უგვიანეს 5 დღისა წერილობით აცნობებს ყოველ კანდიდატს მის მიმართ გამოტანილ გადაწყვეტილებას, ვაკანტურ თანამდებობაზე დანიშვნის უფლების მქონე პირს კი – კომისიის მიერ კანდიდატის წამოყენების ან კანდიდატის წამოყენებაზე უარის თქმის შესახებ.
ჩაშლილი კონკურსი
კონკურსი ითვლება ჩაშლილად, თუ მასში მონაწილეობის მისაღებად არ იქნა წარდგენილი არც ერთი განცხადება, აგრეთვე იმ შემთხვევაში, თუ საკონკურსო-საატესტაციო კომისია უარს განაცხადებს თანამდებობაზე დასანიშნად კანდიდატის წამოყენებაზე.